網上流傳疑似東南亞賣豬仔案受害人遇害影片

歌歌：過去幾日有觀眾send多條唔同背景嘅虐殺影片俾我睇，話係喺討論區見到或者喺朋友group度得返嚟。

Send出嚟嘅人話呢啲影片就係近月被騙去柬埔寨同緬甸做網絡詐騙工作嘅受害人，慘遭殺害嘅過程。

觀眾朋友send俾我，係想知道呢啲影片係咪真嘅。

我睇過咁多條影片，全部都係真實虐殺人類嘅影片，但暫時冇一條係疑似關於賣豬仔案嘅。

有幾條影片係我哋節目以前都播過，通常都係較落後國家市民行私刑嘅影片，或者係黑幫復仇虐殺敵人等等。

就好似圖中嗰張相，係多年前墨西哥一對父子被殘忍虐殺嘅影片（因為我哋節目都有播過，所以知道係乜事）但有觀眾朋友話喺網絡群組見到有人話係賣豬仔案受害人被殺。

終於到今日，有人send呢條片俾我，問係咪關柬埔寨事。

我當然唔會否定詐騙集團嘅手段有幾殘忍，（某程度我都幾肯定佢哋係會好殘忍），但如果影片唔係同案件有關，而大家牙實齒喺唔同群組度瘋傳，就等於不停散播假消息。

以前Deep web 裏面有嘅嘢，而家你喺表網都可以搵到，只要你有心機搵，好多嘢都已經唔係什麼秘密。 所以可能你上網，隨便click下，click多幾個網站，都會俾你發現到嗰啲虐殺影片嘅真相。

亦都有人質疑嗰啲影片係假嘅，覺得冇人會咁殘忍俾人虐殺，同埋就算係都唔會有人拍出嚟。

尋日我都有喺留言處回應一位觀眾，好難聽嘅事實係，人命喺某啲人眼中完全唔值錢，與其要花錢去拍片造假，佢哋寧願嚟真。