DoorDash Girl之亂—公審文化+MeToo運動嘅問題 (Cassie隨筆)

近年香港多咗個風氣，就係遇上D咩奇難雜症、社會不公嘅事，就總係有人話「報東張啦」。某程度上，東張西望係真係可以增加一件事嘅曝光率，比起其他媒介或者處理手法，更加容易獲得社會嘅關注嘅。當然，筆者作為一個傳媒人，對於東張西望某D打住採訪旗號，刺激受訪者，窮追猛打一個唔願意被採訪嘅人，呢林林總總嘅攞料手段我係唔同意嘅。不過我留意到嘅就係，近年其實好多好多人，遇到任何事，第一個反應都係將件事帶上互聯網公審，而唔係用其他途徑解決。當然當刻你覺得自己係受害人嘅話，就覺得公審冇問題，但係當局者迷，樓豬在留言區被圍攻，都不時會發生。跟住落嚟我想講嘅，就係舊年發生嘅DoorDash Girl事件。

事件發生喺2025年10月12號，當日有一條TikTok片爆紅，片中係23歲嘅DoorDash女外賣員Olivia Henderson，即係大家之後叫嘅DoorDash Girl，講述自己送外賣嘅時候嘅經歷。

Olivia喺片入面話，事件發生喺美國紐約州Oswego市，當時Olivia接咗張Wendy’s嘅單，要將食物送到一個男客人嘅屋企。張單標註叫外賣員將外賣放喺門口，當時Olivia去到呢個客人嘅屋企，落車之後就去門口放低食物，點知佢就見到度門打開咗，一望入去就見到一個男人訓喺梳化上面，除咗條褲同底褲，冇著褲咁訓覺。

Olivia見到呢個情況，就即刻拎咗手機出嚟拍片，講述自己嘅經歷，片入面佢冇為呢個男客人打格或者用任何方法遮住個男人嘅樣或者私處，Olivia一路講一路離開男人嘅屋企，仲順手影埋男人嘅門牌，所以基本上睇過呢條TikTok嘅人已經知道晒個男人住邊度同埋咩樣。

Olivia喺片入面話，呢個男人係露體狂，話佢一定係見到外賣員係女性，特登由得自己度門開住，再除褲，等外賣員可以見到佢唔著褲嘅樣。

影片喺TikTok爆紅之後，網民一面倒咁支持Olivia，留言區充滿住「#BelieveAllWomen」、「女外賣員好慘」之類嘅留言，仲有人tag埋外賣平台DoorDash，叫DoorDash快D封鎖呢個變態佬。不過都有人叫Olivia要去報警，Olivia就回覆話喺同DoorDash反映事件之後（即係條片出咗之後嘅一日）都有報警。

但係就正當留言區大部分人都支持Olivia之際，DoorDash竟然好快就取消咗Olivia嘅外賣員帳號，話佢違反咗平台嘅政策。同一時間，TikTok都將Olivia嘅影片移除咗，事件令到Olivia好嬲，隨即拍片反擊，話自己身為「性侵受害人」，係被害者，點解會比平台打壓，會因為被性侵而冇咗份工。

不過呢條片就再度爆紅，不過今次就有人開始批評Olivia。因為Olivia用「性侵受害人」嘅身分自居，仲喺條片大叫自己係受害者，有人就覺得Olivia係誇大其詞，明明個男人都冇掂過Olivia，極其量就係性騷擾，絕對講唔上係性侵，咁樣將事件上升到性侵嘅層面，其實就會令性侵呢個字變得冇咁嚴重，影響真正嘅性侵受害人。

亦有人批評Olivia嘅處理手法，係嚴重咁侵犯個男人嘅私隱，因為呢個男人嘅相貌、住所已經比人公開晒，亦有olivia嘅支持者起咗呢個人嘅底。Olivia先將事件放上網，後來有人叫佢報警佢先報警，某程度上都反映到Olivia想要嘅唔係公義，而係想紅。

事實上，輿論好快180度大變，因為警方介入咗調查。警方調查嘅時候拎到，嘅男人嘅屋企門口門鈴嘅cctv片段，清楚顯示咗Olivia係自己主動打開度門，並唔係佢片入面講嘅「度門大開」。初步調查之後，警方聯絡到個男人，證實咗當時佢係醉酒醉到斷咗片，根本當時係冇意識，冇能力做出任何「性侵」行為。

反觀Olivia，喺人地嘅居所入面，未經他人同意就偷拍，再將偷拍嘅影片放上網，已經係重罪Felony。所以警方喺2025年嘅11月，就以第二級非法監視（unlawful surveillance 2nd degree）同第一級散佈非法監視影像（dissemination of an unlawful surveillance image 1st degree）兩項Class E felony罪名將Olivia Henderson拘捕。

案件經過Grand Jury嘅審議之後，早幾日就決定Olivia Henderson係正式被Indicted，將會轉移到County法院處理，目前Olivia係唔認罪，如果罪成，最高刑罰係監禁8年。

件事最核心嘅問題，我覺得就係網絡公審文化。呢件事最恐怖嘅地方，就係網民嘅反應：一開始「believe all women」嘅情緒完全主導，大家冇睇證據、冇聽雙方說法，就已經判咗男人有罪。男人聲譽受損，自己嘅私密處影相被大量人睇過晒，冇人相信佢。

但係當警方話搵到門鈴cctv片段之後，輿論就大變，變成典型嘅「樓豬變樓豬」。呢D訴諸互聯網公審嘅行為從來唔係追求真相，而係追求情緒發洩同道德爭論。結果好多時，真相未明就已經有人被網暴。

最後講下MeToo運動同「believe all women」嘅不足之處。MeToo本意係好，我覺得可以令唔同受害人勇敢地企出嚟，互相支持，亦揭露咗好多隱藏嘅性侵同騷擾。但當運動由believe all victims演變成「believe all women」，而且唔可以有任何質疑，就會變質。呢個case就係活生生例子：如果冇門鈴cctv嘅片段，個男人可能一世都洗唔甩「性侵犯」標籤，社會死亡。

如果Olivia真係受害人，佢嘅證據又點解咁易被推翻？點解要喺案件細節上講大話？原意係鼓勵受害人勇敢發聲，但係將女性視作永遠嘅受害人，將男人視作永遠嘅加害者，咁其實唔係就係嚴重嘅性別歧視咩？受害人加害人，從來都唔受制於性別，任何人都可以變成受害人，咩人都可以做加害者。點解一定女人講嘅野就要信？女人唔識講大話ga咩？

而基本法律原則無罪推定，都係網絡公審冇嘅野。真受害人需要大家嘅相信同埋支持，但係假指控同樣係一種加害，一樣可以毀人一生，尤其喺互聯網時代，片段一出就冇得del，影響永遠存在。